Yasujirô Ozu

“Se no noso século houbera algunha cousa sagrada, se existise algo coma o sagrado tesouro do cine, para min sería a obra do director xaponés Yasujirô Ozu (…). Por moito que sexa tipicamente xaponés, este cine é, á vez, universal. Eu recoñecín todas as familias do mundo enteiro, e tamén a meus pais, a meu irmán e a min mesmo. Para min, o cine nunca estivera, nin antes nin despois, tan próximo da súa esencia e do seu obxectivo: ofrecer unha imaxe do home do noso século… unha imaxe útil, verdadeira e válida coa que identificarse, mais, sobre todo, desde a cal se pode aprender algo dun mesmo.” Wim Wenders, director de cine

 Un ciclo dedicado a Yasujirô Ozu (1903-1963), o cineasta xaponés, un dos máis importantes da historia e un dos máis influíntes no cinema contemporáneo (de Aki Kaurismäki a Ryūsuke Hamaguchi, entre moitos outros), que se estrutura en dúas partes. A primeira, en maio e xuño, cobre a súa etapa de posguerra (1947-1962), a máis coñecida da súa filmografía, mentres a segunda, en setembro, ha abordar varios dos seus títulos da etapa muda e as súas primeiras películas sonoras, en que se vai configurando un estilo recoñecible como poucos na historia do cine.