(S8) 9ª Mostra de Cinema Periférico de A Coruña

Tempo, estrutura, patróns. Estes son algúns dos principios que guían a novena edición do (S8), baixo o título Lux Algebra. A álxebra, rama da matemática que estuda a combinación de elementos de estruturas abstractas de acordo con certas regras, únese a “lux”, a unidade de medida da luz. Evocamos así esta idea combinatoria no cine, en obras en que o tempo e a estrutura (a través da montaxe e a construción interna) son fundamentais.

Unha das figuras clave deste especial é o estadounidense Ernie Gehr, cuxo traballo nos setenta marcou a definición de cine estrutural (tal e como a concibira P. Adams Sitney). Un cine que lida coa mesma natureza do medio e coa entidade propia da imaxe alén da representación, a través dos mecanismos técnicos da cámara, do celuloide, da luz e da percepción ocular. Outro pioneiro, o austríaco Kurt Kren, estará presente cunha sesión dedicada ás súas obras estruturais, articulada a xeito de master class ao coidado do británico Nicky Hamlyn. Unha montaxe e unha construción case algorítmica, unha ética de traballo punk e unha imaxinación fílmica inesgotable compoñen o traballo que desenvolveu Kren dende finais dos 50, do que Hamlyn deu conta no seu libro (coeditado con A. L. Rees e Simon Payne) Kurt Kren: Structural Films. Poderemos ver tamén o traballo de Scott Stark, cuxas películas se constrúen arredor de certas “regras de xogo” que o cineasta presenta nun traballo tan lúdico como rigorosamente experimental. Nas súas pezas en 16 mm, 35 mm e vídeo, xoga coas propiedades de cada soporte e orixina sorprendentes patróns visuais e sonoros. As súas pezas en súper 8 presentan interaccións que raian na performance coa súa contorna máis próxima. Completan este apartado a sesión “Patróns de interferencias”, programada polo investigador e cineasta Albert Alcoz (na que poderemos ver o traballo de figuras como Barry Spinello, Johan Lurf e Alberto Cabrera Bernal), o programa “Métrica e rima”, unha sesión de traballos recentes e históricos dedicada ás diferentes formas de pensar en estrutura dende o cine, e unha exposición, O cine en papel, dedicada aos diagramas preparatorios ou analíticos de películas, na que poderá verse o traballo de artistas como Paul Sharits, Lis Rhodes e Rose Lowder, entre outros.

En rexistro diferente, o (S8) contará tamén este ano con programas dedicados a Friedl vom Göller, Phil Hoffman, Pablo Mazzolo e Chris Kennedy. A austríaca Friedl vom Gröller combina o cine coa fotografía, nunha obra enraizada no retrato e na observación lírica das persoas que a rodean. Phil Hoffman, nome esencial do cine canadense, parte do persoal e autobiográfico en películas entre o experimental e o ensaístico, nunha sólida filmografía que foi construíndo dende finais dos 70. Hoffman, ademais, presentará o seu proxecto de Film Farm e impartirá un obradoiro. O arxentino Pablo Mazzolo explota as posibilidades do soporte fotoquímico cun manexo certeiro do mecanismo de filmación e montaxe en cámara, en obras onde a luz é protagonista e catalizadora. Chris Kennedy mira alén do evidente na súa obra, que busca entender a perspectiva e o encadramento no cine, e tamén os mecanismos da realidade e a política en traballos como Watching the Detectives, recentemente premiada en Ann Arbor. Ademais, celebramos cun programa o 50 aniversario de Canyon Cinema, mítica cooperativa californiana fundada por cineastas como Bruce Baillie e Chick Strand.

Na sección Desbordamentos poderase gozar das performances do dúo colombiano-alemán residente en Berlín: Ojoboca, que vai estrear un novo traballo no (S8), Scott Stark, Pablo Mazzolo e Tono Mejuto (que presentará o resultado da primeira residencia BAICC, organizada polo (S8) en colaboración con Acción Cultural Española e o LIFT de Toronto).

Sinais segue a traer á fronte o cine galego, esta vez co traballo combativo de María Ruido, que estreará a súa peza Mater Amatísima, participación que se completa cunha master class, unha exposición e unha retrospectiva da súa obra que arrinca en maio. Ademais, Sinais en curto recolle o mellor da colleita anual galega, con obras de Alberte Pagán, Lara e Noa Castro, Ángel Santos, Helena Girón e Samuel Delgado e remata con Marcos Pérez e Martin Pawley.

Agradecementos: María Ruido, Phil Hoffman, Alberte Pagán, Lara e Noa Castro, Ángel Santos, Helena Girón e Samuel Delgado, Marcos Pérez e Martin Pawley, Ernie Gehr, Scott Stark, Antonella Bonfanti, Friedl vom Gröller, Dietmar Schwärzler, Albert Alcoz, Pablo Mazzolo, Rosa Santos, Manolo González, Xisela Franco, Janie Geiser, Brigitta Burger-Utzer.