Ampliar os afectos. O cine de Sumiko Haneda

Pioneira do cinema de non-ficción xaponés, Sumiko Haneda (Dalian, 1926) é unha das poucas mulleres cineastas que conseguiu facerse un lugar nun mundo de homes durante a posguerra, cando entra a formar parte dos estudios Iwanami, produtora de filmes educativos e punto de encontro dos mellores documentalistas nipóns. En 1976, con Usuzumi no sakura, a cineasta independízase para producir as súas propias películas.

Ao longo dos máis de sesenta anos en activo, e cunha obra filmada que comprende máis de cen títulos, Haneda trata temas tan diversos como a preservación da natureza, as artes tradicionais, a desintegración do Xapón rural, o envellecemento da sociedade ou a celebración do traballo e da creatividade das mulleres. Coa atención como principal motor, na súa obra fílmase sempre coa mesma paixón, curiosidade e ética dos afectos.

Facéndose eco do estudo e do recoñecemento crecente cara á obra de Haneda, o ciclo propón un itinerario cronolóxico polas súas obras máis recoñecidas que son, maioritariamente, aínda inéditas no noso país.

Ciclo organizado por: Fundación Japón.

Co apoio de: National Film Archive of Japan (NFAJ).

En colaboración con: Filmoteca de Catalunya, Círculo de Bellas Artes (Madrid), Institut Valencià de Cultura.

Agradecementos: Lumière, Punto de Vista, Il Cinema Ritrovato, Clément Rauger, Moe Shuji, Francisco Algarín, Irene González-López.