Intersección 2023

Na súa sexta edición, INTERSECCIÓN - Festival Internacional de Cine da Coruña, ofrece  na programación unha combinación única de traballos de autores locais, galegos e españois.

Nesta edición do festival, preséntase unha escolma de películas de cine de autor e tamén se abre espazo para as propostas máis vangardistas que fan uso das últimas tecnoloxías, a realidade virtual e mesmo obras xeradas por intelixencias artificiais. As proxeccións deste evento concentraranse en dúas localizacións principais: o Teatro Colón e a Filmoteca de Galicia. Ademais, realizaranse exposicións e outras actividades que abranguen aspectos inclusivos, formativos e profesionais na Sala Palexco e na Fundación Luís Seoane.

Durante os días do evento, a Filmoteca de Galicia acollerá 6 pases da Sección Internacional, que incluirán o cine máis innovador e películas de todo o mundo que superan as barreiras entre os xéneros tradicionais. Contaremos cos últimos traballos de autoras como Teddy Williams, Sophio Medoidze, Iván Argote, Erin Wilkerson, Pauline Curnier Jardin ou Kevin Jerome Everson.

O 18 de outubro sucederá o pase da Sección Escolas, onde competirán obras de estudantes procedentes de diferentes partes de España, xente nova e con gran talento, que manterá un diálogo co público sobre as súas creacións a través dun coloquio.

Dentro da programación dispoñible na Filmoteca Galega tamén se atopa a Retrospectiva de Roee Rosen, cineasta, pintor e novelista israleí nacido en 1963. Será a primeira retrospectiva que se lle dedica ao autor en España, unha das voces máis agudas e críticas en Israel, que se refire e transforma non só o canon da vangarda histórica e as tradicións transgresoras dende o Marqués de Sade ata Georges Bataille, senón tamén os medios populares, a propaganda política e os contos de fadas infantís clásicos. 

A Filmoteca tamén acollerá a sección Miradas Diversas a Coruña, que contará cunha curta creada no obradoiro realizado en colaboración con ASPRONAGA (Asociación pro persoas con discapacidade intelectual de Galicia), APEM (Asociación pro enfermos mentais).