Earth Message. Arthur e Corinne Cantrill e o cine de paisaxe

En gran parte dos filmes de Arthur e Corinne Cantrill non hai historias, nin personaxes, senón que nos topamos fronte á paisaxe e a súa pescuda feita a través do cine, cunha preocupación materialista e ecolóxica. Desprazar a paisaxe do fondo ao primeiro plano formulou moitos desafíos a estes cineastas australianos, o que os conduciu a desenvolver distintas estratexias de filmación en que se relacionan as formas fílmicas coas formas dos lugares.

Ademais de traer ao primeiro plano a rudeza e o rigor da paisaxe australiana, estes cineastas investigan a percepción e a materialidade da propia imaxe ao mesmo tempo que nos formulan preguntas sobre a natureza do cine e a súa capacidade de crear outros mundos. Cuestións que nos remiten non só á relación entre o cine e a observación da natureza, senón tamén á experimentación fílmica do cine primitivo, en particular aos primeiros experimentos sobre a cor.

As películas que veremos neste ciclo realizáronse a partir dos anos setenta, tras a volta dos Cantrill a Australia, cando se cegaron de novo coa luz e mais a cor da súa paisaxe. Foi un período creativo moi intenso onde os cineastas fixeron un conxunto de películas que investigaban tamén a multiproxección e as posibilidades da color. Foi neste mesmo momento cando crearon as Cantrills Filmnotes, publicación que editaron ao longo de case 30 anos.

Celeste Araújo e Oriol Sánchez, comisarios do programa.

Panel: Albert Pagán, Adrian Martin e Celeste Araújo

A charla, ademais de introducir a obra de Arthur e Corinne Cantrill e a súa relación coa paisaxe australiana, tentará tratar tamén outros aspectos do seu traballo que non están nas proxeccións, como, por exemplo, a importancia da publicación Cantrills Filmnotes, a especificidade do seu traballo de multiproxección e o traballo sonoro.

Agradecementos: Arthur e Corinne Cantrill; Angelika Ramlow/Arsenal - Institut für Film und Videokunst e.V.; Celeste Arújo, Oriol Sánchez, Francisco Algarín Navarro, Adrian Martin, Alberte Pagán.