Douglas Sirk: etapa en Hollywood

Logo de revisar na nosa programación de xuño a etapa alemá de Douglas Sirk, cando o cineasta asinaba co seu auténtico nome, Detlef Sierck, neste inicio de curso achegámonos á súa etapa en Hollywood, contratado inicialmente polo estudo Columbia en 1942. Sen dúbida, estamos primeiro ante unha serie de filmes, realizados para Columbia e UA entre 1944 e 1949, non tan (re)coñecidos como os dirixidos na segunda etapa para Universal Pictures, pero todos cheos de talento, moi capaces de xerar atmósferas densas e singulares ao tempo que exhiben os estilemas, preocupacións e temas cruciais da súa filmografía.