Cine de vangardas: 1915-1947

Houbo un tempo, entre dúas guerras, en que o cine tiña a xeografía dun campo de batalla. Loitábase por impoñer unhas regras de xogo para unha nova industria, para un novo soporte artístico, narrativo, político. Na batalla, como en todas, houbo vangardas, tantas como grupos ou individuos coa intuición para adiviñar límites que se poidesen traspasar, e que tentasen de facelo.

Dese tempo, deses grupos e individuos proceden os materiais que conforman o presente ciclo, froito da colaboración entre o Centro Galego de Artes da Imaxen e as Universidades de Santiago de Compostela e Vigo. O obxectivo do ciclo é volver aquí e por uns días, os autores e títulos incluidos ó seu lugar, a pantalla, antes dos tornar ós manuais onde residen, en negriñas, o resto do tempo.

A programación non é exhaustiva. Está restrinida, por unha parte, ás vangardas clásicas - segundo a convención, ata Dreams that Money Can Buy -, e, por outra, ás disponibilidades de material en distribución. Non fumos ortodoxos na selección; figuran materiais que alguén máis purista non definiría como vangardistas, pero que, sen dúbida, comparten a vontade batalladora de rachar cos límites, aínda que sen pertrechar en ismos. Preferimos incluílos.

De calquera xeito, ó longo de doce sesións - comentadas por outros tantos ensaístas, críticos e autores galegos no catálogo que acompaña o ciclo - han desfilar diante nosa imaxes de quen buscaban; buscaban o específico do cine, ou a súa pureza, ou formas propias para un presente convulso. Procedían da pintura, da fotografía, da literatura, do teatro ou, sinxelamente, do oficio do cine e do patio de butacas. En boa medida, os límites que traspasaron nunca foron recorridos de novo. E ese fracaso pode alentar hoxe novas sorpresas, irritación, aborrecemento e entusiasmo, que é o que pasa cando un se sae do camiño.

Jaime Pena

O ciclo tivo lugar nos seguintes espazos:

A CORUNA

18 xaneiro - 2 febreiro

Sala de proxeccións do CGAI

Rúa Durán Loriga 10

SANTIAGO

25 xaneiro - 12 febreiro

Auditorio da Universidade

Campus Sur

LUGO

1 febreiro - 18 febreiro

Minicines Dumas / Escola Universitaria de Maxisterio

VIGO

8 febreiro - 26 febreiro

Auditorio Centro Cultural Cidade de Vigo

PONTEVEDRA

15 febreiro - 2 marzo

Teatro Principal

OURENSE

22 febreiro - 9 marzo

Salón de Acto da Biblioteca Pública

Rúa Concello