Premios Mestre Mateo 2018

Do 15 ao 18 de maio, a Academia Galega do Audiovisual en colaboración co Centro Galego de Artes da Imaxe (CGAI) proxectará algúns dos traballos gañadores da XVIª edición dos Premios Mestre Mateo e proporá ademais coloquios con directores e directoras e tamén outros membros do equipo técnico e creativo.

Desde o ano 2002 os socios e as socias da Academia escollen os traballos audiovisuais máis salientables realizados durante o ano anterior. A escolla realízase en dúas fases, unha primeira na que participan a totalidade de traballos presentados e unha segunda, e definitiva, das obras finalistas que atinxiron maior respaldo. Os premios son entregados durante unha gala emitida en directo pola Televisión de Galicia, que este ano se celebrou no Pazo da Ópera da Coruña.

En 2018, Dhogs, ópera prima do meirego Andrés Goteira, converteuse na produción con máis galardóns da historia dos premios, pois venceu en trece categorías. Outra ópera prima, A batalla descoñecida, dirixida por Paula Cons, gañou o premio ao mellor documental. O colectivo Porco Bravú gañou o seu terceiro Mestre Mateo á mellor serie web con Peter Brandon. Matria, de Álvaro Gago, conquistou o de mellor curtametraxe e The neverending wall o de mellor curtametraxe de animación. A peza para o tema Troubled Times do grupo norteamericano Green Day, dirixida por Manu Viqueira, alzouse co premio ao mellor videoclip e Serramoura conseguiu, por cuarto ano consecutivo, o premio á mellor serie de TV.

Máis aló de premiar a excelencia nas producións do ano, a Academia aproveita os Mestre Mateo para recoñecer a traxectoria de entidades e profesionais sobranceiros do audiovisual en Galicia co Premio de Honra Fernando Rey e o Premio Especial José Sellier. Este ano o primeiro deles foi para a actriz María Bouzas, que o recolleu na Gala e agradeceu o “espazo de liberdade, de creación e de respecto” que supoñen a Academia Galega do Audiovisual e os Premios, e o segundo recoñeceu o traballo de Multicines Norte, considerado un “espazo de referencia para a cinefilia galega”.