OLLADAS DE MULLERES NO MUNDO (CREADORAS GALEGAS DE IMAXE) (2015)

OLLADAS DE MULLERES NO MUNDO (CREADORAS GALEGAS DE IMAXE) En colaboración co Consello da Cultura Galega. Co gallo do Día da Muller Traballadora, un ano máis o Consello da Cultura Galega e o CGAI dedícanlle unha semana da súa programación, un ciclo en que as figuras femininas son as protagonistas. Directoras, guionistas, produtoras, actrices, unha tentativa de amosar outras olladas e perspectivas. Comezamos co único título de directores masculinos, Dos días, una noche, dos irmáns Dardenne, dúas veces gañadores en Cannes. Un filme sobre a muller no ámbito laboral nun contexto de crise. A intérprete principal, Marion Cotillard, acaba de ser nomeada ao Oscar á mellor actriz polo seu papel de traballadora que intenta que os seus compañeiros renuncien á paga extraordinaria para ela conservar o seu posto na empresa. O particular naturalismo dos Dardenne liga con Mil noches, una boda, de Marie Amachoukeli-Barsacq, Claire Burger e Samuel Theis, o retrato dunha muller libre de 60 anos e as complexidades dos afectos e a contorna social. Pola súa banda, Amour fou, de Jessica Hausner, está inspirada na historia do poeta Heinrich von Kleist e a súa procura dunha compañeira para se suicidar en pleno Romanticismo alemán; ambas a dúas achegan senllos retratos femininos con forza. Na sección Creadoras Galegas de Imaxe ofrecemos dous títulos: Muller(es)Muller, de Inés Pintor, producido por SocialDocs, amosa a vida de mulleres dunha mesma familia pertencentes a tres xeracións distintas: as dificultades e diferenzas na educación, na percepción, no papel desempeñado…, e O tesouro de Corcoesto, adscrita ao documental militante e dirixida pola galega Cora Peña. A estes engadimos Se dice poeta, da asturiana Sofía Castañón, que se aproxima a 21 poetas, entre elas tres galegas establecidas na Coruña: Yolanda Castaño, Estíbaliz Espinosa e María Couceiro. Estas últimas sesións contarán coa presenza das súas autoras.