Esenciais: Mikio Naruse

En colaboración coa Fundación Japón, Filmoteca de València, Filmoteca de Catalunya e Círculo de Bellas Artes de Madrid, presentamos esta retrospectiva esencial dedicada a Mikio Naruse (1905-1969), un dos grandes mestres do cine xaponés cunha obra á altura de nomes tan coñecidos como Ozu, Kurosawa ou Mizoguchi. Mais nas últimas décadas tivemos menos oportunidade de gozar das súas películas, marcadas por amores cheos de complexidade e retratos de mulleres de personalidade forte que se confrontan cos límites sociais. 

“Naruse non é o “cuarto grande” entre os xaponeses senón, sinxelamente, un dos vinte ou vintecinco máis grandes autores cinematográficos que existiron no mundo. Sete das once películas súas que vin merecen o gastado cualificativo de «obras mestras». E ao menos dúas delas, La voz de la montaña e Nubes flotantes, e talvez unha terceira, Cuando una mujer sube una escalera, parécenme tan boas coma as mellores de Mizoguchi, Ozu, Ford, McCarey, Chaplin, Rossellini, Dreyer, Renoir ou Hitchcock, é dicir, comparables ás máis grandes da historia do cine” (Miguel Marías).

As proxeccións terán lugar na Fundación Barrié.