A xeración da violencia USA (V)

En colaboración con Donostia Kultura, Filmoteca Vasca e IVAC-La Filmoteca de Valencia.
Ata o mes de abril gozaremos dun percorrido pola xeración de cineastas estadounidenses que comezan a súa carreira entre finais dos anos 40 e a década dos 50 (xente como Nicholas Ray, Sam Fuller, Anthony Mann, Richard Fleischer, Robert Aldrich, Richard Brooks ou Don Siegel), contribuíndo á renovación da linguaxe fílmica mediante un elaborado cuestionamento e superación dos paradigmas narrativos e temáticos clásicos inmediatamente anteriores. Por medio de obras tantas veces modestas en medios de produción, sen eludir traballos directamente de serie “B”, estes cineastas expoñerán relatos crus, marcados pola intensidade e a violencia, dinamitando desde dentro as esencias do cine de xénero nun contexto próximo adverso, invadido por un extremo conservadorismo sociopolítico. Con motivo deste ciclo sairá un número monográfico da revista “Nosferatu”.