Lois Patiño: Marea

Coincidindo coa exposición Lois Patiño. Marea (25 xaneiro – 4 abril 2024, Fundación Luis Seoane, A Coruña), comisariada por Alberto Cartón, a Filmoteca de Galicia propón tres sesións en que se proxectan os catro últimos traballos do cineasta vigués: dúas curtametraxes, Sycorax (codirixida con Matías Piñeiro) e El sembrador de estrellas, mais dúas longametraxes, Lúa Vermella e Samsara.

“Marea é unha vertebración alterada do espazo-tempo, unha suspensión narrativa a partir do traballo audiovisual de Lois Patiño.

A exposición xira arredor de dúas pezas: Hadal, unha instalación composta por un vídeo, dúas videoinstalacións e unha instalación lumínica; e a curtametraxe experimental El sembrador de estrellas. A escolla das obras implicou unha consideración sobre a súa percepción, a súa correlación e tamén o relato cos espazos de exhibición, que non son só físicos, tamén apreciativos: a ollada, a memoria, a sensibilidade, o exercicio de achegamento e comprensión. Marea, coas súas dúas beiras, incita ao desprazamento, á pausa e a un escorregamento do tempo en devir desde o seu agora.

A instalación Hadal «mergúllanos nunha incerta escuridade do mar, e reflexiona sobre aspectos perceptivos e sensoriais da experiencia submarina. A flotabilidade do corpo, a atención á respiración e ao movemento oscilante da luz, envólvennos nunha experiencia íntima de fonda introspección», como describe o seu autor. Unha transposición entre abismo oceánico, corpo «amniótico» e ensimesmamento perdurable.

En continuidade, aínda con localizacións xeográficas e argumentos aparentemente diverxentes, a curtametraxe experimental El sembrador de estrellas, gravada en Toquio en 2022, recolle a escuridade nocturna, cicelada entre as luces da cidade constelada, e potencia a asimilación de certa mística contemplativa, que reverbera desde as palabras case líquidas que texturizan a peza. Unha flutuación entre o onírico e o racional, coa paisaxe cognitiva e condicional que sempre é un guion proxectivo para Lois Patiño.” (do texto de presentación da exposición)