GUNVOR NELSON

En colaboración co Festival de Cine Europeo de Sevilla. Comisariado por Miguel Fernández Labayen e Gonzalo de Pedro.
Pintora de formación, sueca da promocion de 1931, cineasta experimental de traxectoria moi descoñecida e practicamente inédita en España, residente moitos anos en San Francisco; a produción audiovisual de Gunvor Nelson vaise fundamentar na aproximación radical ás cuestións cotiáns, por onde flúe ás veces unha beleza insospeitada. A liberdade absoluta dunha obra comezada nos anos 60, vai partir dunha idea fermosa: a cámara como ferramenta de celebración e descoberta do mundo, o aparato cinematográfico como construtor de beleza. A propia autora prefire, antes que cine de vangarda ou experimental, referirse á súa obra como “persoal”, unha mostra de variedade e intensidade fóra do común marcada pola coherencia estilística e o surrealismo dos sentidos. Nelson executa cada filme como un exercicio único, como capas visuais e sonoras capaces de interactuar, filmes inzados de segmentos de animación, colaxes ou xogos de transparencias onde o corpo feminino, a familia, o peso do tempo e o humor adquiren absoluta vixencia.
Agradecementos: Gunvor Nelson, Canyon Cinema (San Francisco), FilmForm (Estocolmo).