As Tears Go By

• Share on twitter
• Share on facebook

Por un lado temos a Ah Wah, un pequeno gánster que traballa para un dos padriños da hampa local e cuxo maior desvelo é protexer o seu arroutado irmán menor, Fly, de todas as leas nas que se mete, a maioría delas provocacións a outros gánsters da súa mesma banda. Por outro, temos tamén a Ah Wah na súa historia de amor coa curmá, Ah Ngor. A vida de Ah Wah bascula entre estes dous polos, vitais e físicos, o primeiro desenvólvese no centro de Hong Kong, o segundo nunha illa turística da mesma colonia. A ópera prima de Wong Kar-wai está inevitablemente ligada ao cine de xénero dese primeiro polo, de gran popularidade en Hong Kong e a súa razón de ser desde o punto de vista dos seus produtores, mais a súa inclinación polo segundo polo está fóra de toda dúbida e representa o xermolo do seu cine posterior.