La flor (Parte 2)

• Share on twitter
• Share on facebook

Parte 2: Episodio 3

La Flor é un monumental complexo narrativo integrado por seis historias independentes e sucesivas. O punto de unión que teñen entre si é que cada unha delas está protagonizada polas catro mesmas actrices: Pilar Gamboa, Elisa Carricajo, Laura Paredes e Valeria Correa. O universo das devanditas ficcións é radicalmente diferente dun episodio ao outro, de feito o realizador proponse desde o comezo pór de relevo esa diferenza extrema. Así mesmo, os personaxes que as catro actrices encarnan en cada relato aspiran a mesma variedade. Pilar Gamboa, por exemplo, é unha feiticeira no primeiro, unha cantante pop no segundo, una espía muda no terceiro, ela mesma no cuarto, un personaxe secundario, case invisible, no quinto e unha presa fuxida na Pampa do século XIX no sexto. Cada unha das actrices haberá de saltar dun universo ficcional a outro, coma nunha danza de máscaras. O obxectivo de Mariano Llinás é duplo: por un lado, converter as actrices en máquinas de narrar, depositar no seu corpo a obriga e a responsabilidade de dar conta das nomeadas ficcións para provocaren en nós, como dicía Samuel T. Coleridge, a suspensión voluntaria da incredulidade que é o obxectivo último de calquera práctica artística; e por outro lado, que o salto dunha ficción a outra nos revele, ao longo do vasto traxecto narrativo, a verdadeira faciana desas mulleres.