La femme de nulle part

O guión de La femme de nulle part parte dunha serie de oito crónicas atribuídas a Ève Francis e publicadas en Film en 1917 e 1918. O filme produciuno en 1921 Félix Juven, propietario e editor dun xornal. A rodaxe tivo lugar nos Studios des Buttes-Chaumont, na Provenza e nunha mansión nos arredores de Gênes. O rol principal estaba inicialmente previsto para Eleonora Duse, mais como o seu estado de saúde non lle permitía actuar, foi substituída por Ève Francis. A actriz adopta o conmovedor papel de La Duse para encarnar este personaxe lúgubre e devastado, obsesionado polos demos do pasado e suxeito a múltiples visións. O uso limitado dos intertítulos equilíbrase coas actitudes: sombría e inquieta no marido (Roger Karl), pensativa e atormentada nas dúas mulleres. A morada illada, baleira e austera está cargada de simbolismo. A natureza rigorosa e os elementos climáticos destacan un sentimento de inclemencia. O clima substitúe os discursos. Delluc considera La femme de nulle part o seu filme mellor acabado: “Esta confrontación do presente e do pasado, da realidade e do recordo a través da imaxe, é unha das tramas máis sedutoras da arte fotoxénica. [...] Cada un ten algo nel ou unha historia que cre morta e que as pantasmas da pantalla non tardan en reanimar”.

O filme estreouse o 8 de setembro de 1922. Se o éxito de público non o acompaña, a crítica é cando menos eloxiosa.