Fièvre

Tulip's Bar, nova escrita por Delluc e publicada na revista Fantasio o 1 de xullo de 1919, é a orixe do guión de La Boue, primeiro título atribuído a Fièvre. A rodaxe do filme, producido por Alhambra-Film, comezou en febreiro de 1921 nos estudios de Buttes-Chaumont, con algúns planos de exteriores filmados en Marsella. Para encarnar os roles secundarios que elevan as interpretacións de Edmond Van Daële, Gaston Modot, Ève Francis e Elena Sagrary, o cineasta procurou actores amateurs. L.V. de Malte é un bébedo pegado á súa mesa, Léon Moussinac un mariñeiro, a súa muller Jeanne, a galante Flora, o pallaso Footit o home do chapeu gris. As interpretacións son sobrias e espléndidas, o ritmo entrecortado. Delluc serve un cadro dun realismo sorprendente. Cada personaxe debátese coa súa soidade, nun ambiente pechado e depravado, bañado dos aires de Hindoustan saídos do piano mecánico. Á nostalxia, ao aburrimento e ao soño, Delluc engade o desexo, a pantasma e os misterios da viaxe. Baixo a pulsión da embriaguez e a tolemia, a tensión progresiva tórnase velenosa.

La Boue (a lama) presentouse á censura en abril de 1921. Algúns planos de violencia e de espidos consideráronse subversivos e o título provocador. Os censores esixiron cortes. Retitulado Fièvre, o filme estreouse no outono de 1921. Seduciu o público e a crítica eloxiouno.