Narcisa Hirsch 3. Pocos son los que conocen el secreto del amor

ANDREA 1973

Narcisa Hirsch | 1973 | Arxentina | 16mm a HD | 10 min.

Cine-carta de Narcisa Hirsch á súa filla, Andrea Hirsch, para o seu aniversario número 21.

RAFAEL, 1975

Narcisa Hirsch | 1975 | Arxentina | Super 8 a HD | 11 min.

Unha declaración complexa e entrecortada de amor de Narcisa Hirsch a Rafael Maino. Un retrato de mirada sensual e cálida: a da cámara, e a que lle devolve o propio Rafael.

ORFEO Y EURÍDICE

Narcisa Hirsch | 1976 | Arxentina | Super 8 a HD | 12 min.

Sobre a música de Orfeo e Euridice, do compositor Christoph Willibald Gluck, vense imaxes de Rafael Maino e Narcisa Hirsch nas súas viaxes pola Patagonia. (Filmoteca Narcisa Hirsch)

POCOS SON LOS QUE CONOCEN EL SECRETO DEL AMOR. V3.

Narcisa Hirsch | 1976 | Arxentina | Super 8 a HD | 7 min.

Unha das tres escenas nas que momentos cotiáns da convivencia dunha parella se mesturan coa lectura do ardoroso poema do romanticismo alemán «O secreto do amor», de Novalis. Conxugar a banalidade da rutina coa avasaladora loucura transitoria do namoramento, a única vía posible do amor e ao tempo a máis difícil.

CAPRICORNIO 78

Narcisa Hirsch | 1978 | Arxentina | Super 8 a HD | 20 min.

Narcisa Hirsch naceu o 16 de xaneiro baixo o signo de capricornio. Estes diarios rotulados como Capricornio 78 presentan unha aproximación ao cotián dunha tenrura e unha beleza inusitada: un paxaro bebé ao que un neno coida amorosamente, unha tenrura que nace, cans e gatos, unha casa na neve, un incendio, Narcisa no céspede, Narcisa nadando, unha vida plena.

RAFAEL, AGOSTO DE 1984

Narcisa Hirsch | 1984 | Arxentina | Super 8 a HD | 12 min.

«Fun moi feliz contigo, e agora sobre as augas inclínanse os xuncos. Non hai nostalxia». Con motivo do aniversario de Rafael Maino, Hirsch elabora unha cine-carta usando imaxes que filmaron xuntos na Patagonia e viaxando por Chile e Brasil, así como imaxes de corpos (sobre todo masculinos) que ela pensou que a el lle atraerían. A banda sonora móstranos a Hirsch reflexionando sobre a súa relación tumultuosa ao longo de sete anos. Rafael, agosto de 1984, forma parte dun especial universo na filmografía de Hirsch, xunto a Rafael 1975 e Orfeo y Eurídice. (Cecilia Barrionuevo, Catálogo da Viennale 2023)