Sesión 4: Macián, o mestre

Sesión 4: Macián, o mestre
Francisco Macián (Barcelona, 1929-1976) é un dos nomes fundamentais da animación en España. Montou o seu propio estudio en Barcelona en 1955, desde onde realizou publicidade para os Estudios Moro e, máis adiante, a súa primeira longametraxe, El mago de los sueños (1966), inspirado no conto de Andersen Ole Cierraojos ( Ole Lukøje) e protagonizado pola familia Telerín, arquipopular grazas ao anuncio para TVE Vamos a la cama (1965). As referencias “disneyanas” e o excelente traballo de fondos de Salvador Mestres, Jaume Vila, Jordi Gim, Albert Rué, Carmelo Garmendia e Vicar (tamén creador da personaxe do Mago), combínanse co deseño moderno e inconfundible dos personaxes de José Luis Moro. Na concepción sonora destacan as cálidas voces de nenos de verdade xunto á de artistas do momento, como Los 3 Sudamericanos, Chicho Gordillo, Ennio Sangiusto ou Los de la Torre, e a música asinada por Josep Solà. A pesar de ser a súa ópera prima, e das dificultades que houbo de afrontar ao longo da produción, é un dos títulos máis celebrados da animación española. Como precedentes da sesión proxéctanse dous anuncios de Macián dos anos 50.

Buena mesa (aceite Koipe), Francisco Macián, 1955-57, 1' 08''
Sinfonía escarlata (tomate Corchero), Francisco Macián, 1958, 1'10''
El mago de los sueños, Francisco Macián, 1966, 70'
(Para todos os públicos)