Truffaut: as películas da miña vida

En colaboración con: IVAC-La Filmoteca de Valencia.

Antes de se converter nun prestixioso director, François Truffaut (1932-1984) traballou como crítico, resultando un voraz e autodidacta escritor, un rigoroso analista. Logo de flirtear explicitamente con formas de vida preto da delincuencia, frecuenta a mestres inspiradores como André Bazin ou Jean Genet, que o introducen nun universo cultural intenso e apaixonado. Figura clave a través de publicacións como Cahiers du cinéma e Arts-Lettres-Spectacles, el –xunto aos seus compañeiros da Nouvelle Vague, en especial Rivette, Rohmer, Chabrol e Godard- contribúe a construír un novo tipo de esixencia cinematográfica, denunciando os excesos academicistas (a tradición da calidade) de directores franceses consagrados como Autant-Lara, Clement, Allégret ou Jean Delannoy e reivindicando cineastas populares hoxe indiscutibles. Convertido en afamado cineasta, á altura de mestres como Fellini, Bergman ou Kurosawa logo de gañar o Óscar por La noche americana (1973), Truffat aproveita un ano sabático para volver á edición de libros de cine. O guión da película premiada e o diario da rodaxe de Fahrenheit 451 van seguidos dunha recompilación ben selectiva dos seus artigos de formación. Baixo o título Les films de ma vie (1975) -homenaxe ao Henry Miller de The books of my life- Truffaut decide deixar fóra as diatribas negativas e cinguirse a un centenar de artigos sobre as películas importantes da súa vida. Editado en España pola editorial Mensajero de Bilbao ao ano seguinte, o libro de François Truffaut recupera clásicos e amosa as claves do seu saber. Aproveitamos a actualidade da súa figura, revisada a traves de publicacións e retrospectivas, para expoñer varios focos relacionados con el, que terán continuidade nos vindeiros meses. Comezamos con nove películas -incluíndo títulos pertencentes en simultáneo a outros ciclos do CGAI, como La condesa descalza ou Touchez pas au grisbi- destacadas no libro de 1975 -títulos non tan considerados de autores como Hitchcock, Chaplin, Aldrich, Ray, Lang, Renoir e a eminente achega do actor Charles Laughton á dirección- e apoiadas polo criterio entusiasta e lúcido do autor de Los cuatrocientos golpes e Jules y Jim.