INFLUENCIA DE WENCESLAO FERNÁNDEZ FLÓREZ NO CINE ESPAÑOL

Este ciclo realízase no eido e co apoio do proxecto de investigación "Hacia una reconsideración de la cultura posbélica: análisis de los modos de representación en el cine español (1939-1962) a partir de la impronta de Wenceslao Fernández Flórez (CSO2012-34648) (2013-2015, Plan Nacional de I+D+i, Mineco-Gobierno de España).

Con motivo do 50 aniversario do falecemento do escritor coruñés Wenceslao Fernández Flórez (1885-1964) en 2014, e a partir dunha investigación exhaustiva de máis de dúas décadas vinculada a un proxecto de investigación de I+D+I que tenta afondar e dar forma a este traballo, xorde este ciclo unido ao Simposium Costumismo, humor, melancolía. Reflexividade: impronta de Wenceslao Fernández-Flórez no cinema español (USC-Ágora, 27 e 28 de marzo) que o acompaña. O obxectivo é tratarmos de determinar con precisión de que maneira as peculiaridades estilísticas, formais e temáticas dos modos de representación do cine español parten de xeito decisivo da influencia literaria do escritor coruñés Wenceslao Fernández Flórez.
Alén do estudo das numerosas adaptacións das súas obras no período que nos ocupa e da idoneidade argumental que amosan para elaboraren relatos fílmicos, parece indiscutible que o eco da súa obra literaria, coincidente en boa parte coa ditadura primorriveirista e convertida, ao se transformar en películas tras a Guerra Civil, é materia sorprendentemente adecuada para ser metáfora do desolador panorama da época. A pegada do seu xeito de observar o mundo, crítica e melancólica, costumista e reflexiva, expándese das máis diversas formas á práctica totalidade do cine hispano, ata se converter nun dos materiais nutrientes máis destacados á hora de definir con solvencia uns modos de representación propios, tanto no que se refire á súa vertente argumental e semántica, como á súa concepción discursiva e visual.
O ciclo (10 títulos, incluíndo o pase de Camarote de lujo de Rafael Gil o 2 de abril no Teatro Colón) componse de adaptacións de Wenceslao Fernández Flórez ao cine, títulos directamente vinculados ao seu universo e mais doutros de extraordinaria transcendencia na historia do noso cine en que a irradiación dos seus elementos ou personaxes é aínda incontestable e permite a proxección de filmes de cineastas da significación de Berlanga, Bardem, Fernán-Gómez, Rafael Gil ou o ourensán Antonio Román. Acompaña o ciclo un libro-folleto, con textos de relevantes historiadores do cine e a literatura, sobre a, en verdade, transcendente relación entre o escritor galego e o cine español.

Agradecementos: Filmoteca Española, Cristina Bernáldez, Vídeo Mercury, Arturo Marcos, Share Total.