DESENCADRES: STAN BRAKHAGE, MIKE HOOLBOOM

Grazas a unha proposta de Curtocircuíto, o Festival Internacional de Curtametraxes de Santiago de Compostela, temos a visita de Mike Hoolboom (Ontario, 1959), artista canadense que traballa en celuloide e vídeo. Ten creadas máis de cincuenta obras e, malia que a maioría delas foron retiradas de circulación, queda unha ducia que aínda se poden visualizar. Os seus traballos levan aparecido en máis de catrocentos festivais, nos que recibiu trinta galardóns. Hoolboom foi recoñecido co Premio Tom Berner ao servizo comunitario e con dous premios a toda unha carreira, o primeiro deles concedido pola cidade de Toronto e o segundo no Mediawave Festival (Hungría).
Presentáronse retrospectivas do seu traballo no Images Festival (Toronto), no Visions du Réel (Suíza), no Cork International Festival (Irlanda), no Cinema De Balie (Amsterdam), no mencionado Mediawave Festival, no Impakt Festival (Holanda) e no Jihlava Documentary Festival (República Checa), entre outros. Alén disto, é membro fundador do colectivo de proxección denominado Pleasure Dome e desempeñou o cargo de director artístico do Images Festival e de coordinador de cinema experimental no Canadian Filmmakers Distribution Centre.
Montadas ao longo de oito anos (1973-1980), as cinco películas da serie Sincerity desenvólvense durante un período que cubriría trinta anos da biografía de Stan Brakhage e a súa familia. Brakhage sérvese de material propio, auténticas home movies, pero tamén de metraxe filmada por Bruce Baillie, Jane Brakhage, Larry Jordan e Stan Phillips, entre outros. Sincerity está concibida en paralelo a outra serie, Duplicity (1978-1980), e xunto con outras, como, por exemplo, Scenes From Under Childhood, conformarían un xigantesco ciclo autobiográfico, The Book of Family.

Agradecementos: Curtocircuíto. Festival Internacional de Curtametraxes de Santiago de Compostela, Pela del Álamo, Mike Hoolboom, Canyon Cinema.