Mr. Arkadin / Confidential Report / Mister Arkadin

MR. ARKADIN / CONFIDENTIAL REPORT / MISTER ARKADIN
(España-Francia-Suíza, 1954)
Dirección: Orson Welles. Guión: Orson Welles. Fotografía: Jean Bourgoin. Produción: Cervantes Film, Sevilla Film Studios e A Mercury Production. Intérpretes: Orson Welles, Paola Mori, Robert Arden. Duración: 95 minutos.
Un home moribundo profire unhas últimas palabras, un nome, ao mariñeiro que o encontra: Mister Arkadin. Despois de moitas investigacións, o mariñeiro consegue dar co escuro millonario, que vive pechado coa filla nunha mansión da Costa Azul. Arkadin solicita que se indague no seu propio pasado. Unha produción europea chea de problemas, mesmo varias montaxes e versións diferentes, rodada en España e marca da casa: manierista, teatral, creadora de atmosfera, posuidora dunha potente escenografía e xiros visuais. Constitúe outra aproximación de Welles ao poder mais aos seus delirios.