La zona de interés

• Share on twitter
• Share on facebook

Rudolf Höss (Christian Friedel) e a súa esposa Hedwig (Sandra Hüller) levan unha vida perfectamente normal, case idílica, na súa coqueta casa, xunto aos seus varios fillos. O fondo do xardín fai entrever un muro, de lonxe intúese un feo fume e de cando en vez soan apagados horribles berros ou tiros de armas de fogo. Hedwig está encargada, como boa ama de casa, de todas as xestións do fogar. Rudolf, do que hai alén dese muro: o campo de exterminio de Auschwitz.

Glazer adapta a novela de Martin Amis de forma libre cun precepto cinematográfico que leva ás súas máximas consecuencias: como trasladar o horror de Auschwitz sen mostralo en imaxes, como traballalo en fóra de campo. O deseño de son xoga un papel importantísimo, así como os decorados. O británico mandou instalar multitude de pequenas cámaras nas paredes, de maneira que a intervención á hora de filmar fose mínima, buscando un naturalismo xélido por parte dos actores. Comanda o elenco Sandra Hüller, xa que o marido apenas aparece polo fogar; personifica ela a banalidade dese horripilante mal que foi Auschwitz.