Curtametraxes Johann Lurf

• Share on twitter
• Share on facebook

Nesta sesión ordenada en tres partes definidas, o espectador poderá deixarse ir, coma se dunha atracción dun parque temático se tratar, por un itinerario de pezas que experimentan co tempo fílmico a través de diferentes técnicas que van do found footage, división multipantalla nun único plano, contraposición de movementos lentos de cámara con bandas sonoras aceleradas, cortes de plano inverosímiles ata a ruptura de raccord. (Tito Rodríguez, Catálogo FICX 2018)

Primeira parte: Introdución ao Cine

(untitled) Johann Lurf (Austria, 2003) 3'

Pantalla dividida en 12 seccións en que se suceden escenas de filmes diferentes, que van enchendo paseniño o espazo, a se converteren nunha obra en si mesma que conta a súa propia historia.

THE QUICK BROWN FOX JUMPS OVER THE LAZY DOG Johann Lurf (Austria, 2009) 3'

Montaxe minuciosa de frames de distintas películas e found footage, que resulta nunha obra cinemática cun poder incrible, hipnótica no seu constante fliqueo (pestanexar eléctrico) comparable con ver unha película a toda velocidade.

Segunda parte: Espazo, tempo… movemento

PAN Johann Lurf (Austria, 2005) 2'

Unha soa panorámica, unha pantalla dividida en tres. Tempo e espazo multiplícanse para dotar de tridimensionalidade unha peza na procura da tan botada en falta pantalla circular.

A TO A Johann Lurf (Austria, 2011) 5'

Unha viaxe en Vespa arredor de 100 rotondas do sur de Austria compoñendo unha escolma de paisaxes estraña, mais divertida.

RECONNAISSANCE Johann Lurf (Austria, 2012) 5'

Desde o punto de vista dun espía armado cun teleobxectivo descubrimos a través de pausados planos xerais os segredos dunha base de probas de lanzamento de torpedos en California.

EMBARGO Johann Lurf (Austria, 2014) 10'

Mediante planos xerais con movementos de cámara fluídos inmiscímonos en fábricas de armamento e equipos de vixilancia, acompañados por una banda sonora vibrante e acelerada.

VERTIGO RUSH Johann Lurf (Austria, 2007) 19'

Homenaxe ao mítico plano hitchcockiano da escaleira en Vértigo, Lurf emprega as árbores dun bosque como unha referencia espacial que se vai diluíndo entre a variación da distancia focal e o movemento de cámara nun tempo que vai medrando e que remata hipnotizando o espectador nesta viaxe por unha montaña rusa visual.

Terceira parte: Un epílogo tras 10 segundos na escuridade

CAPITAL CUBA Johann Lurf (Austria, 2015) 12'

Un estudio experimental da paisaxe costeira cubana entre a Habana Vieja e Casa Blanca, onde cada poucos segundos a montaxe nos leva dunha banda á outra da embarcación cunha ruptura de raccord que xera un efecto de inquietude, malia ser unha obra que flúe cun tempo invariable, mais que ao mesmo tempo é desconcertante e bela.