Entre camiños

"Ábrese paso o amencer no Alto da Pena. Vai moito frío. A vila érguese cedo e os habitantes collen camiños diferentes para facer o seu traballo. É primavera e estamos no mes de abril. Esta é unha ollada ao que sucede de cotío en Tenorio."

Así empeza a película filmada polo grupo de 6º de primaria do Ceip de Tenorio. Durante varios meses exploran os arredores da escola e inspirados por Un día en Barbaglia de Vittorio de Seta retratan a vida en Tenorio desde o amencer ata o atardecer, o espertar do día na panadería, o traballo na soldadura, a repartición da carteira e a peixeira, as avoas cociñando, o salón de peiteado, as hortas, o descanso, o paseo coas ovellas, o seu tosquiar, a pastora que recolle as súas cabras, a mercería, a música e o baile no atardecer, cando termina o día.