Almas sin conciencia

IL BIDONE /ALMAS SIN CONCIENCIA
(Italia, 1955)
Dirección: Federico Fellini. Guión: Federico Fellini, Ennio Flaiano e Tullio Pinelli. Produción: Titanus. Fotografía: Otello Martelli. Intérpretes: Broderick Crawford, Richard Basehart, Franco Fabrizi, Giulietta Massina. Duración: 95 minutos.
Cinco días na vida de tres estafadores (Augusto, Picasso e Roberto). A tipoloxía do engano comeza co seu disfraz de clérigos para cobrar misas polas almas dos mortos; destinatarios, xente humilde. A obra de Fellini máis incomprendida deste periodo, eclipsada no Festival de Venecia por filmes de Dreyer e Antonioni e obrigada a cortes de montaxe, aparece como unha prolongación de Los inútiles, cos protagonistas practicando o bidonismo, entendido como arte da simulación e da mentira. De novo a herdanza neorrealista é sobrepasada pola reflexión constante sobre os mecanismos de creación, do xogo e a manipulación, o discurso sobre o paso do tempo e a ironía observacional latente. Un título a redescubrir cunha escena final (protagonizada polo gran actor estadounidense Broderick Crawford) inesquecible.