Sesión 1: Historia (Silencios)

ENERO, 2012 (O LA APOTEOSIS DE ISABEL, LA CATÓLICA)
(España, 2012)
Dirección, guión, produción e fotografía: Los Hijos. Duración: 18 minutos.
Os autobuses turísticos son inventos moi intelixentes para viaxeiros con pouca vontade de pensar: ofrecen un cómodo percorrido polo mellor das cidades, con tránsitos coidadosamente deseñados para esquivar calquera conflito. O resultado: imaxes amables e uniformes, relatos de consenso, visións do país en que a historia e as súas xentes son tan aparentemente neutras como politicamente manipuladas. O colectivo Los Hijos, preocupados sempre por desmontar as representacións oficiais, por lle dar a volta ás imaxes, sérvese dun destes autobuses que percorren Madrid para formular un traballo de radical separación entre o visible e o que se agocha: outra cidade, oculta á mirada dos turistas acomodados. Presente nos certames de Marsella, L' Alternativa e Mar del Plata.

AUSTERITY MEASURES
(Grecia, 2012)
Dirección, guión e fotografía: Guillaume Cailleau e Ben Russell. Produción: Guillaume Cailleau. Duración: 8 minutos.
No berce da civilización occidental ensáiase o noso futuro inmediato: medidas de austeridade, privatización dos servizos públicos, recortes das liberdades e precariedade da vida. As columnas do Partenón asisten impotentes á imposición dun novo sistema feudal baseado nunha débeda eterna e impagable. Filmando os graffitis gregos en 16 mm, e separando as imaxes en vermello, verde e azul, Cailleau e Russell crean unha distorsión visual que funciona como metáfora da pelexa que se dá nas rúas: os puños sobrepóñense ás columnas dunha Acrópole que parece eterna. Presente na Berlinale e en Rotterdam.

MITOTE
(México, 2012)
Dirección e fotografía: Eugenio Polgovsky. Produción: Tecolote Films. Duración: 53 minutos.
O mitote era unha danza tradicional dos aztecas. Cando os españois a viron non a entenderon en absoluto, e alí onde os seus executantes aplicaban unha orde e un sentido, os conquistadores vían só caos e confusión. Hoxe, para os mexicanos, mitote é sinónimo de escándalo e desorde… O percorrido histórico das palabras di moito sobre as formas en que os pobos se relacionan co seu pasado. En Mitote (a película), Polgovsky aplica a súa habitual ollada de entomólogo ao centro neurálxico dun país irado, contraditorio e rico na súa vida pública, a praza do Zócalo da capital. Alí, un día calquera, as forzas do país enfróntanse, implosionan e xeran novas formas de cultura…, todo baixo a atenta vixilancia dunha xigantesca bandeira nacional, símbolo de unidade para todos os mexicanos.

VIVA PARADIS
(Bélxica, 2011)
Dirección, produción e fotografía: Isabelle Tollenaere. Duración: 18 minutos.
Hai tempo que o turismo amosou non ter nada que ver coa viaxe: os turistas fotografan antes de miraren e non se preocupan tanto do lugar que visitan coma dos servizos que este lles ofrece. Por iso non ten nada de perversa a imaxe duns turistas a gozaren dunhas merecidas (ou non) vacacións nun contexto de desolación, morte e apocalipse. Iso é o que retrata Isabelle Tollenaere neste aparentemente retrato inocuo dun hotel semibaleiro nunha Tunisia de posguerra: tempo conxelado, rutinas sen sentido e actividades de ocio que perden todo o seu sentido cando caemos na conta de que o que hai fóra das paredes do hotel paradisíaco ten máis que ver co inferno que cos folletos das axencias de viaxes.