María Casares no seu centenario

Sinalada como mito teatral e símbolo do exilio republicano español, en 2022 celebramos o centenario da actriz coruñesa María Casares (1922-1996). Afondando na súa traxectoria e as moitas aproximacións sobre o seu recorrido artístico, constatamos que ningún aspecto resulta máis desatendido que a práctica cinematográfica. Protagonista unicamente dunha veintena de filmes de ficción en perto de 50 anos, pouca televisión e contados documentais, convén desmitificar a dicotomía histórica que pesa sobre o seu traballo. O cine intervén de modo decisivo na súa popularidade, na conversión na década dos 40 en estrela da interpretación, e tamén son notables, pola súa relevancia estética e histórica, os filmes que vai rodar con cineastas da estima de Bresson, Carné, Cocteau, Franju ou Semprún. Se a isto lle engadimos que na súa madurez, logo de anos de seca fílmica, a selección de papeis aparece presidida pola coherencia e a carga simbólica, ocasionando interpretacións marcadas polos sucesos e eleccións dunha vida apaixoante, do exilio e a guerra española aos valores republicanos, o compromiso, o propio xogo co rol de mentora ou a profesión de actriz, ben podemos observar que en María Casares nada resulta fútil e todo proveitoso. A escolma realizada para este ciclo permitirá ver algunhas das liñas de traballo mencionadas, así como materiais máis insólitos (entrevistas, recitados, teatro filmado para televisión,...).