Programa 9. Noticiario español (I)

Producido polo Departamento Nacional de Cinematografía, este noticiario é o primeiro que obtén regularidade de edición no lado franquista, desenvolvendo o papel de órgano oficial de información do recentemente creado “Movimiento Nacional”. Ao longo dos 18 números editados -sobre un total de 32- durante a guerra, o noticiario traza unha auténtica panorámica da vida oficial na España franquista, con imaxes que permiten facerse unha idea da vida real, incluso a través dos desfiles e conmemoracións. O primeiro número contén noticias de abril e maio de 1938 e o nº 18 relata os últimos días da guerra. A maior parte das noticias corresponden a actos militares e conmemoracións políticas, pero intercalan imaxes como o recitado dun romance popular en Pobra de Sanabria (Zamora), inmerso nun clima tráxico no que as mulleres dunha vila, onde todos os homes están ausentes ou mortos, recitan/cantan unha curiosa versión da canción infantil “Mambrú se fue a la guerra”.

Noticiario Español nº 1. Abril-maio 1938
Duración: 16’23”.
Contén as seguintes noticias: combates na Cidade Universitaria de Madrid. Actividades da Organización Falanxista Auxilio Social en Vinaroz inmediatamente despois da toma desta vila. Conmemoración do día de San Fernando na Granja (Segovia). Actos de solidariedade italo-españois. Avance das tropas franquistas en Tortosa (Tarragona). Delegados militares visitan a zona do Alto do León (serra de Madrid) onde tiveron lugar duros combates. Construción do monumento ao xeneral Mola, morto a finais de xuño de 1937. Primeira revista naval, presidida polo xeneral Franco, celebrada no Mediterráneo, no porto de Vinaroz.

Noticiario Español nº 2. Maio-xuño 1938
Duración: 11’56”.
Contén estas noticias: actos conmemorativos da liberación de Bilbao coa presenza dos xenerais Moscardó, Solchaga, García-Valiño e López Pinto. Presentación de cartas credenciais do Nuncio de SS e do embaixador de Portugal, en Burgos. Recollida da colleita. Ruínas do Palacio do Infantado en Guadalaxara e manipulación de imaxes: correspondendo a xuño de 1936, inmediatamente posteriores á represión da sublevación en Guadalaxara, preséntanse como se fose un palacio que acabasen de incendiar os roxos. Entrada das tropas franquistas en Castellón: imaxes da entrada das tropas e rótulos alusivos ás actividades políticas republicanas na cidade. O secretario da Falanxe, Fernández Cuesta, asiste á botadura do cruceiro “Navarra” en Ferrol.

Noticiario Español nº 3. Xullo 1938
Duración: 10’.
Contén as seguintes noticias: conmemoración en Ourense do segundo aniversario da morte de Calvo Sotelo. Xura de bandeira dos alféreces de Infantería. Guerra en Levante: operacións do exército franquista na zona de Castellón. Grupos de prisioneiros reparando estradas. Ruínas das vilas de Bielsa e Parsan no Perineo de Huesca. Imaxes do saqueo dunha igrexa por milicianos republicanos en localización non identificada (posible ficción). Actividades da organización falanxista Auxilio Social.

Noticiario Español nº 4. Xullo 1938
Duración: 9’33”.
Contén as seguintes noticias: ofrenda anual de España ao Apóstolo Santiago celebrada o 25 de xullo polo ministro do Interior Sr. Serraño-Suñer. Entrega do Pazo de Meirás, palacio preto da Coruña, doado polo concello ao xeneral Franco. Procesión mariñeira da Virxe do Mar en Santurce (Biscaia). Guerra en Levante: operacións das columnas do xeneral Asensio na zona de Nules e Burriana en Castellón. Ruínas de ambas as vilas. Algemesí, delegación americana do comité de axuda á España republicana. Segovia: representación dun auto sacramental polo teatro da Falanxe. O xeneral Millán Astray e o coronel Beigbeder son agasallados por persoeiros marroquís.

Noticiario Español nº 5. Xullo-agosto 1938
Duración: 10’30”.
Contén as seguintes noticias: Peñíscola (Castellón) que vén de ser liberada. Operacións na batalla do Ebro. Toma do macizo e o val do Pando en manobras dirixidas polo xeneral Alonso Vega. Imaxes da zona republicana: Conmemoración en Madrid (novembro 1937) do 20 aniversario da revolución soviética. O comentarista presenta a Madrid totalmente sometido á ditadura comunista. Fronte de Estremadura: Colleitas queimadas no Val da Serena (Badaxoz). Ponte voada en Don Benito (Badaxoz). Inspectoras da Sección Feminina da Falanxe visitan unha vila.

Noticiario Español nº 6. Setembro 1938
Duración: 15’20”.
Contén as seguintes noticias: inauguración dunha exposición de Auxilio Social en Bilbao. Os xenerais Varela e Moscardó nunha exposición de material de guerra capturado ao inimigo. Nüremberg: congreso anual do partido nazi; preside Hitler asistindo o xeneral Espinosa de los Monteros como representante de España. Acordo de Múnic: Chamberlain, Dedalier e Mussolini acoden a Múnic onde os recibe Hitler.