This is not a film

THIS IS NOT A FILM
(Irán, 2011)
Dirección: Jafar Panahi, coa colaboración de Mojtaba Mirtahmasb. Guión e produción: Jafar Panahi. Fotografía: Jafar Panahi e Mojtaba Mirtahmasb. Duración: 75 minutos.
Sen poder filmar, escribir ou saír da casa, o director iraniano Jafar Panahi agarda o veredicto do tribunal de apelación con estas prohibicións sobre a súa vida. Sen crebar de todo as barreiras impostas, anímase a narrar en primeira persoa o momento que transita, a espera e a posible realización de proxectos futuros. Un desafío, unha queixa, unha toma de posición e unha declaración de principios; todo nun filme que anuncia non ser tal. Como filmar e non facer unha película? Como conseguir non infrinxir a lei? A cámara do amigo, Mojtaba Mirtahmasb, axuda a afrontar a condena xa confirmada de seis anos de prisión, sumado isto aos moitos impedimentos. Lenda ou realidade, o traballo suponse que chegou a Cannes a través dun lapis USB agochado nun alimento. O filme serve para presentar o último libro do profesor e crítico Ángel Quintana, Después del cine. Imagen y realidad en la era digital, reflexión sobre as transformacións tecnolóxicas, unha obra editada por Acantilado.