Boccaccio ’70

• Share on twitter
• Share on facebook

Actualización do espírito do Decamerón á Italia dos sesenta para explorar o sexo, o amor e a moralidade nesa altura. Magna produción que reuniu a catro grandes directores con estrelas como Anita Ekberg, Romy Schneider e Sophia Loren.

No primeiro dos capítulos, Renzo e Luciana, asinado por Mario Monicelli, unha parella debe agochar o seu matrimonio, pois traballan para a mesma empresa, que prohibe as relacións entre os seus asalariados.

Segue A tentación do Dr. Antonio, de Federico Fellini, cun estilo acedo e un tema caro ao autor. Un home moi puritano intenta retirar un cartel publicitario dunha exuberante muller mentres comeza a ter fantasías eróticas coa mesma.

Continúa Luchino Visconti coa sección O traballo, unha exploración dos seus ambientes burgueses, na que un conde se ve envolto nun asunto con prostitutas, contra o que a esposa contraataca cobrándolle polos seus servizos sexuais.

Pecha a fita Vittorio De Sica con A rifa. Nela, unha moza organiza un concurso nunha feira de Nápoles cuxo premio é pasar unha noite con ela. Gaña un home tímido e devoto, o que produce efectos cómicos.