Morreu o demo, acabouse a peseta

MORREU O DEMO, ACABOUSE A PESETA
(España, 2013)
Dirección: Pedro Solla. Guión: Marcelo Martínez e Pedro Solla, sobre unha idea orixinal de Marcelo Martínez. Produción: Comba Campoy e Marcelo Martínez, co apoio de AGADIC e TVG. Fotografía: Cora Peña. Duración: 78 minutos.
Desde os anos dez do século pasado e durante case cinco décadas, unha familia de marionetistas –os Silvent- gañou a vida levando o seu espectáculo de monifates de feira en feira. A estrela do espectáculo era un boneco de luva chamado Barriga Verde, que chegou a ser moi popular en toda Galiza. Co obxecto de restaurar a memoria dos Silvent e a personaxe que crearon, a compañía de monicreques Viravolta decide construír unha réplica da vella barraca dos Silvent e devolvela aos camiños. Ao afondar na xenealoxía de Barriga Verde, o filme lévanos nunha viaxe internacional na busca das raíces comúns do teatro popular de marionetas europeo. Sen o saber, o noso pequeno heroe tiña unha chea de primos por todo o continente.