Ons

• Share on twitter
• Share on facebook

O regreso á longametraxe de Alfonso Zarauza –seis anos despois d’Os fenómenos- representa o mellor dos seus filmes, triunfador na última cerimonia dos premios Mestre Mateo. Coproducido con Portugal, as prestacións técnicas e artísticas son impecables (actuacións, fotografía, deseño sonoro,…) e Zarauza traza un relato medido, íntimo, enigmático e delicado, un retrato complexo de seres errantes no sentimental co fondo engaiolante da illa de Ons. A chegada ao lugar dunha parella en crise, posiblemente alterada pola morte en accidente da amante do home, intérnanos nun mundo en que o mito e o relativismo de toda noción dan lugar a unha topografía dos sentimentos onde a aparición dunha singular figura creba toda armonía.