Mati Manas

• Share on twitter
• Share on facebook

En 1985, o Festival da India encargou a Mani Kaul un filme sobre a arte da cerámica. A súa resposta foi Mati Manas, película onde interactúan diferentes niveis; por un lado, os estados mentais que conducen á fabricación das vasillas e figuras son trasladados ao cine como medio: acenos, olladas, posturas, movementos, cadencias, ritmos e rimas. Por outra banda, as contornas e as localizacións (paisaxes e museos) e os estados (de fascinación ou de hipnose) van dando forma ao que Kaul chamaba «a realidade non ficcional», onde se combinan os mitos vencellados á tradición do barro ou da terracota coa observación da vida, dos costumes e do traballo das diferentes comunidades de ceramistas.