Paulo Branco

Paulo Branco (Lisboa, 1950) iniciase no mundo do cine en París, cidade na que organiza en 1974 unha semana de cine portugués. En colaboración con Fréderic Mitterand entra no campo da exhibición cinematográfica, programando varias salas da capital francesa. En 1978 funda a distribuidora Hors-Champ e, xa en Lisboa e en colaboración con Antonio Pedro Vasconcelos, a productora V.O. Filmes. Desde entón, a través de diversas sociedades (Les Films du Passage, Filmargen, e na actualidade a lisboeta Madragoa e a parisina Gemini), leva producidos máis de sesenta títulos, a máis de participar como productor executivo ou asociado noutra ducia. A súa penetración na industria cinematográfica portuguesa complétase coa sociedade de exhibición Medeia Filmes e coa distribuidora e editora videográfica Atalanta Filmes. En 1981 produce Francisca, de Manoel de Oliveira, iniciando unha colaboración co gran mestre portugués ata hoxe ininterrompida e que xa comprende once títulos (incluído o último, Party).

Outros destacados autores cos que ten traballado son Raúl Ruiz, Wim Wenders, João Botelho, João César Monteiro, João Mario Grilo, Alain Tanner ou Danièle Dubroux, entre moitos outros, caso dalgúns dos novos valores do cine portugués: Joaquim Pinto e Pedro Costa. A homenaxe que agora lle dedica o CGAl comprende quince películas, a maioría dos anos noventa. Abre o ciclo Lisbon Story, de Wim Wenders, para recuperar logo tres dos films máis significativos do cine portugués dos anos oitenta, todos datados en 1981: a citada Francisca, Conversa acabada, de Joao Botelho, e Silvestre, de João César Monteiro. Completan no mes de outubro a homenaxe sentos títulos de Tanner (Dans la ville blanche), Dubroux (Border line) e novamente Oliveira (a inédita comercialmente en España, O día do desespero).

Xa en novembro, películas recentes de Oliveira, Botelho, Monteiro, Pinto, Grilo e Costa, posiblemente os nomes máis representativos do cine portugués contemporáneo. Destas películas, catro conforman un dos proxectos máis singulares da carreira de Branco, unha tetraloxía coproducida coas cadeas de televisión Arte e RTP sobre os catro elementos: a auga, a terra, o aire e o lume.