This is Now: film and video after punk

THIS IS NOW: FILM AND VIDEO AFTER PUNK
En colaboración con Lux, BFI National Archive (Londres).

This Is Now: Film and Video After Punk é unha gran retrospectiva producida pola distribuidora británica Lux que centra a súa ollada no cine e o vídeo da era pospunk no Reino Unido. O ciclo comprende un total de sete programas temáticos que o CGAI-Filmoteca de Galicia presenta entre o 7 e o 28 de xuño de 2016.
Os primeiros 80 foron testemuñas dun estoupido na produción independente e alternativa de imaxes en movemento. Clubbers, estudantes de Belas Artes, novos románticos e membros da escena pospunk comezaron a se servir de tecnoloxías caseiras para subverteren os medios mainstream e encontrar novos modos de expresión. Lanzáronse fitas VHS independentes que esquivaron a censura e o Súper 8 foi adoptado como un novo medio tan barato como lírico. O DIY (do-it-yourself) do punk renacera con novas forzas.
Os artistas desafiaron os convencionalismos sobre como se debería facer cine e quen debería facelo. Mulleres, gays e cineastas negros deron un paso adiante, a ocuparen espazos e desenvolveren novos estilos e técnicas. Os colaboradores de Derek Jarman, John Maybury e Cerith Wyn Evans, experimentaron co Súper 8 e enrolaron como actores a amigos: Leigh Bowery e Siouxsie Sioux participaron en historias fragmentarias e oníricas. Isaac Julien e Grayson Perry exploraron os discursos de representación persoal e cultural; e a gran directora de vídeo clips pop Sophie Muller (Beyoncé, Rihanna, The Strokes) utilizou a película de 16 mm superpondo capas de imaxes.
This Is Now conmemora a diversidade da produción de cine e video independiente no Reino Unido na década de 1980, un momento único en que o abaratamento das novas tecnoloxías fixo posible que as novas voces fosen tidas en conta. Unha nova estética impúxose no cine, a televisión, a moda ou a música durante os anos seguintes. O BFI National Archive restaurou vinte películas en Súper 8 e 16 mm deste período, moitas das cales saen á luz pola vez primeira en máis de tres décadas. Elaborados durante varios anos, estes programas fannos voltar a unha etapa clave na vida cultural do Reino Unido, a un tempo que reflicten a súa influencia nos vídeos de Internet e no cine de hoxe en día.

William Fowler (BFI National Archive)

Agradecementos: María Palacios Cruz, Nicole Yip/Lux (Londres).