Jean Eustache (I)
Do 1 de maio de 2009 ao 31 de maio de 2009
En colaboración con Filmoteca de Catalunya, Filmoteca Española e IVAC-La Filmoteca de Valencia.
Artista extremo, herdeiro da Nouvelle Vague e admirado por Serge Daney, autor de obras de taciturna beleza, Jean Eustache (1938-1981) deixou unha produción breve, circunscrita aos anos que van das mediametraxes Du Cote de Robinson / Les Mauvaises fréquentations (1963) ou Le Père Noel a lês yeux bleus (1965) a Offre d´emploi (1980). Nos inicios a liberdade narrativa, o ritmo dinámico, a espontaneidade, os actos explosivos, a observación naturalista, a crueza non exenta de calidez, a facilidade case documental para integrar aos personaxes na paisaxe urbana veñen presididos pola conciencia estilística que se torna na década dos 70 nun engarzamento etnolóxico ou cartografía do tempo que lle toca vivir, unha intensidade e lucidez de carácter poético que lle permite captar o signo dos seus tempos. Eustache, como o outro gran minimalista, Maurice Pialat, axuda a despedir á Nouvelle Vague con títulos persoais como Numéro zéro (1971), La Maman et la putain (1973) e Mes petites amoureuses (1974). Experiencia dos límites e procura dun cine radical que non nega vías primitivas, o ciclo de Eustache vén acompañado do libro co-editado polo CGAI co BAFICI (Buenos Aires Festival Internacional de Cine Independiente), Jean Eustache. Un fulgor arcaico.
Agradecementos: Laurence Berbon, Tamasa Distribution (Francia).
