Fóra de serie

O curso impartido por Ángel Quintana, “Cine 2.0. Imaxe e realidade na era dixital“, que terá lugar no CGAI entre os días 19 e 23 de abril, lévanos a escoller dous títulos, Redacted (2007) de Brian de Palma, e Iraqi short films (2008) de Mauro Andrizzi, onde as transformacións da imaxe, o cambio de soporte e as consecuencias da era dixital cobran un papel relevante, ao tempo que se ofrecen como suxestivas variantes sobre idéntico suceso, a guerra de Iraq. Ambas as sesións estarán presentadas por Quintana, coñecido profesor, crítico e escritor cinematográfico e asiduo desde hai anos nos seminarios e actividades do CGAI.
A estrea doutro dos traballos galegos máis agardados, Canedo (2010) do dúo de artistas visuais Vicente Vázquez e Usue Arrieta (WeareQQ), xunto á repesca doutra das súas pezas anteriores, permite transitar as vías de creación máis innovadoras e singulares da produción recente.
Agradecementos: Vicente Vázquez, Usue Arrieta, Ángel Quintana, Mauro Andrizzi, La Casa Encendida (Madrid), Diorama, Begoña Alonso, Filmoteca Española, Cristina Bernáldez.