FKM Festival Internacional de Cinema Fantástico da Coruña (10ª edición)

O FKM Festival Internacional de Cinema Fantástico da Coruña celebra este ano a súa 10ª edición. FKM naceu en 2010 por mor da necesidade de crear un evento dedicado aos xéneros cinematográficos fantástico, de terror e de ciencia ficción, non só na cidade da Coruña, senón tamén no ámbito de Galicia. O Festival FKM está a encher un oco, demandado pola cidadanía, dentro do audiovisual e constitúese coma o 1º Festival de xénero de Galicia que ofrece unha coidada escolma de longametraxes e curtametraxes de amplo percorrido polos mellores festivais nacionais e internacionais.

Caracterizado polas súas edicións temáticas, nesta ocasión o festival centrarase no SEXO, PROVOCACIÓN E CENSURA, e renderalle homenaxe, entre outros, a Walerian Borowczyk.

O cine de xénero ten a cualidade de pór de manifesto as nosas paixóns e os nosos medos ou a de satisfacer as nosas represións e desexos máis agochados. Por iso, é capaz de turbar ou crispar o espectador máis avezado. Isto fai del un dos terreos máis fértiles para a semente da subversión e a práctica da transgresión.

Nesta edición mostraremos e contextualizaremos a obra de autores cuxa fantasía resultou especialmente transgresora ou subversiva, ata o punto de pagar a súa ousadía coa censura, o ostracismo ou o exilio.

Walerian Borowczyk (1923-2006), de orixe polaca, foi un dos mestres do cine erótico máis importantes da historia do cine. Artista controvertido, comezou a súa carreira como diseñador gráfico facendo carteis de películas en Polonia. Logo pasou ao mundo da curtametraxe, onde colaborou con directores coma Jan Lenika ou Chris Marker e realizou curtametraxes de animacion que mesturaban diversos estilos e que estaban moi influenciados polo simbolismo e o surrealismo. Borowczyk desenvolveu un estilo personalísimo e creou películas audaces e complexas, cargadas de sensualidade e cun alto grao subversivo. A súa obra foi fortemente censurada na maioría de países e algunhas das súas películas chegaron inclusive a estar prohibidas. En España, en 1987, na TVE dirixida por Pilar Miró, suspenderon a emisión da súa película Interior dun convento (1978), baseada nunha obra de Stendhal e con fotografía de Luciano Tovoli, por considerala “extremadamente forte” e que ía “atentar contra cantidade de cousas”. O escándalo foi tal que a emisión de catro escenas desta película de 30 segundos de duración no programa De 7 en 7 que se emitía os domingos, provocou a destitución do seu director e realizador, José Luís Hernández Batalla.

O Concurso Internacional de Longametraxes Ópera Prima, organizado polo FKM, consta dunha selección de primeiras e segundas longametraxes de directores/as. O Concurso Internacional de Curtametraxes, xerme do festival, presenta as mellores obras feitas no mundo. Os seus obxectivos son contribuír ao desenvolvemento da Industria e das Artes Audiovisuais e mais fomentar a incorporación de novos e novas cineastas á cultura cinematográfica; préstase especial atención ás visións de xénero e ás producións galegas.