DocumentaMadrid: João Moreira Salles

Economista de formación, presidente do Instituto Moreira Salles (organización cultural creada polo seu pai Walter Moreira Salles), fundador da revista Piauí, ademais de profesor, guionista, montador e produtor, o cineasta brasileiro João Moreira Salles iniciou a súa carreira cinematográfica en 1985 por mediación do seu irmán, o tamén realizador Walter Salles, que lle pediu axuda nun dos seus proxectos. Dende daquela o seu achegamento ao cine parte sempre dunha preocupación esencial: reinventar as formas, xogar cos puntos de vista para permutalos e perturbalos e revisar os modos de narrar… En definitiva: expandir as posibilidades da linguaxe cinematográfica e a súa capacidade reflexiva.

(...) proxectaranse tres títulos cardinais da súa filmografía. Entreatos (2004), o primeiro deles, mergúllanos nos bastidores da última fase da campaña política que levou á presidencia a Lula da Silva en 2002. Conversas, reunións, momentos íntimos e familiares que dende a pura observación revelan o Lula máis descontraído e bromista, mais tamén o ‘personaxe’ político e actor, perfectamente consciente do poder da imaxe, mentres ofrecen o rexistro privilexiado daquel momento histórico. Santiago (2007), pola súa parte, revélase coma un complexo filme reflexivo que arrinca a partir dunhas imaxes filmadas no pasado polo cineasta co obxectivo de realizar unha película familiar sobre o mordomo da casa da súa infancia. O material acaba por se converter nun apaixonante xogo metadiscursivo sobre a capacidade de representación do cine. Pola súa parte, No Intenso Agora (2017), en tanto que filme-ensaio, parte do descubrimento de imaxes afeccionadas rodadas na China da Revolución Cultural para ofrecer un repaso polo contexto político do 68 en Francia, Checoslovaquia e Brasil, ademais dunha nova reflexión sobre o estatuto das imaxes. (...)

Poderá verse ademais Ultimas conversas (2015), filme póstumo de Eduardo Coutinho que o cineasta terminou de editar tras a súa morte. Considerado por Moreira Salles como unha das súas referencias esenciais, con Coutinho mantivo ademais dunha intensa amizade, unha frutífera relación profesional como produtor. (...)

DocumentaMadrid