GIRLS ON FIRE
Do 1 de maio de 2013 ao 30 de xuño de 2013
En colaboración con: REC. Festival Internacional de Cine de Tarragona.
Girls On Fire son películas filmadas por directoras mozas que captan o sentir dunha xeración e superan as fronteiras do cine de xénero. Achegan a súa ollada persoal, feminina, que se traduce nunha realización atrevida, vibrante, intrépida, para atrapar unha voluble e complexa temática de rabiosa actualidade. Unha realidade que pon de acordo creadoras das orixes máis dispares, que cos seus diferentes estilos amosan unha comuñón de ideas sorprendente. Trátase tamén de tres películas dirixidas e protagonizadas por mulleres, inéditas nas salas comerciais españolas e que están destinadas a se converter en obras de culto. Pódese dicir que Tiny Furniture (2010), a segunda longametraxe de Lena Dunham e a que a catapultou á HBO e á fama con Girls (2012-2013), xa o foi desde a súa mesma presentación no prestixioso festival South By Southwest de Austin (SXSW), berce da nova comedia norteamericana. Clip (2012) alzouse cun dos Tigres do Festival de Rotterdam e confirmou o talento de Maja Miloš na súa película de estrea en que se nos revelou unha moi moza e volcánica Isidora Simijonovic a explorar os fantasmas e mais inseguridades da adolescencia. Finalmente, Joven y alocada (2012), vista en Sundance, San Sebastián ou Bafici, onde levou un dos seus premios, é unha perfecta representante da frescura e falta de prexuízos do novo cine chileno, unha película sobre blogues asinada por outra debutante, Marialy Rivas.
Agradecementos: Xavi García Puerto.