Extraterritorial: Adolfo Arrieta

Continúa esta sección iniciada en novembro de 2007 e nada coa vocación de presentar traballos de corte experimental, propostas periféricas e alternativas, fóra tanto de convencións narrativas como de circuítos de exhibición e distribución ao uso. Presididas pola quebra coa narración institucionalizada, amosamos propostas heteroxéneas pouco coñecidas, atípicas e a contracorrente, á marxe da senda pola que circula o resto da produción. Este mes, seleccionamos dous traballos de Adolfo Arrieta, cineasta que ademais chega a colaborar con Jean Eustache e que vén de facer novas montaxes de todos os seus traballos. Arrieta (Madrid, 1942) comeza a súa carreira como pintor, pero pronto e en formato 16 mm., influído por Cocteau, filma as curtametraxes El crimen de la pirindola (1965) e Imitación del ángel (1966). Establecido en Francia, onde a súa obra é ben recibida e conta coa colaboración de actores de prestixio (Jean Marais, Howard Vernon) e produtores independentes, asina obras de culto como as dúas pezas que podemos ver este mes Les intrigues de Sylvia Cousky (1973) ou Tam-Tam (1975), obtendo difusión internacional por circuítos paralelos, ademais de premios en distinguidos festivais. Dono dun cine poético, persoal e de vocación vangardista e formulación clandestina, regresa a España e roda títulos como Merlín (1990) ou Vacanza permanente (2006). O CGAI vén proxectando pezas da súa filmografía desde hai dous anos no que será unha retrospectiva completa.
Agradecementos: Adolfo Arrieta, Jos Oliver.