A comedia segundo... Preston Sturges

O CGAl inicia un ciclo intermitente que, ó longo dos vindeiros meses, tentará achegar ós espectadores a obra mais representativa dos principais cultivadores da comedia clásica americana. A comedia segundo... reunirá tres ou catro mostras, sempre en verxión orixinal, de cada autor: Lubitsch, Hawks, Wilder, Capra, etc. O primeiro director seleccionado é un dos máis recoñecidos pola crítica especializada, á par que un dos máis descoñecidos polo público en xeral: Preston Sturges.

Nado en Chicago en 1898, Sturges recibiu unha educación do máis cosmopolita e refinada. Acompañando á súa nai por Europa, viviu en París, Berlín, Bayreuth ou Deauville, onde, con quince anos, rexentou a casa de cosméticos materna. Afeccionado ós inventos, recalou finalmente en New York, onde o destino quixo que trunfase como autor teatral. A fama acadada motivou o interese da Paramount, que, en 1930, contratou os servicios do xove escritor.

O longo da década dos anos trinta Sturges convertiuse nun dos guionistas mellor pagados de Hollywood. Entre os guións escritos por él neste período destacan: Strictly dishonorable e Imitation of life, de Stahl; We live again, de Mamoulian; Port of seven seas, de Whale; Easy leaving e Remember that night, de Leisen, etc. Este último abriulle as portas da dirección: Sturges vendeu o seu novo guión, The great McGinty, por un só dólar, a cambio da posibilidade de que fose dirixido por el mesmo.

Estamos en 1940 e Preston Sturges inicia así o seu período máis froitífero, que se prolongará ata 1944. Tralo Oscar obtido polo guión de McGinty, Sturges escrebe e dirixe toda unha cadea de grandes éxitos de público e crítica: Christmas in July, The lady Eve, Sullivan's travels, The Palm Beach Story, The miracle of Morgan's Creek, Hail the conquering hero. A acidez e sarcasmo destas comedias configuran a principal característica do estilo de Sturges, un estilo que tomaba un pouco do "slapstick", outro pouco da comedia sofisticada e moito da "screwball comedy". Desta síntese saíron películas como as mais arriba citadas, realizadas todas elas en plena Segunda Guerra Mundial e tachadas polos medios máis reacionarios do país de antimilitaristas e antipatrióticas.

Igual de fulgurante que o seu ascenso, foi a súa caída. Preston Sturges abandoaría Hollywood en 1949 tras catro fracasos consecutivos e tras caer nas mans de Howard Hughes e da Fox. A súa derradeira película americana foi un estrano western paródico titulado The beautiful blonde from Bashful Bend. Posteriormente tan só volvería a dirixir Les carnets du Major Thompson, xa en 1955 e con producción integramente francesa.

A homenaxe que lle adica o CGAl comprende catro dos seus filmes: un escrito por el, pero dirixido por Mitchell Leisen, Easy Leaving (1937), así como as súas tres realizacións máis populares, The lady Eve (1941), Sullivan's Travels (1941) e The Palm Beach Story (1942).