GRIZZLY MAN

GRIZZLY MAN
(Estados Unidos, 2005)
Dirección e guión: Werner Herzog. Produción: Discovery Docs, Lions Gate Films (Estados Unidos). Fotografía: Peter Zeitlinger. Duración: 103 minutos.
Revalorizado por filmes como este, aínda que nunca inactivo na súa procura de experiencias humanas límite, o alemán Werner Herzog explora a vida do activista Timothy Treadwell, dedicado á protección de osos Grizzly e finalmente devorado por eles en outubro de 2003. Partindo de imaxes tomadas por Treadwell, dotada dunha intelixente narración do propio Herzog, amosa a inconsistencia das clasificacións e divagacións tradicionais sobre o documental como práctica fílmica limitada, converténdose en obra de culto que concentrou rituais descargas por Internet.

DSK
Despegue, Paisaxe e DSK
Dirección: DSK (Juan Lesta e Belén Montero). Duración: 4 minutos.
Auténtico cine en código ASCII. Proxeción de tres pezas incluídas no “Proxecto-Edición” que codirixen CGAC, MARCO e Fundación Luís Seoane da Coruña. ASCIIart consiste nun sistema dixital no que se traducen as imaxes a liñas compostas por caracteres (código ASCII), os cales recrean as formas da imaxe inicial. Para a permanencia analóxica da imaxe neste formato, DSK proxecta en celuloide 35 mm a película xerada coa súa información en ASCIIart.