Pico Sacro

«A crise actual non está menos vinculada á absolutización da vita activa. Esta conduce a un imperativo do traballo, que degrada a persoa a animal laborans. A hiperkinesia cotiá arrebata á vida humana calquera elemento contemplativo, calquera capacidade para demorarse. Supón a perda do mundo e do tempo. As chamadas estratexias de desaceleración non son capaces de acabar coa crise temporal contemporánea. En realidade, non fan máis que agochar o verdadeiro problema. Cómpre unha revitalización da vita contemplativa. A crise temporal só se ha superar no momento en que a vita activa, en plena crise, acolla de novo a vita contemplativa no seu seo».

Byung-Chul Han, El aroma del tiempo

A idea para esta película xurdiu hai cinco anos, cando estaba a facer sendeirismo polo monte coa familia e vimos, ao final do roteiro, unha montaña maxestosa. A impresión foi enorme e deime conta ao instante de que podería estar horas observándoa; era hipnótica. Sen baixar á miña filla das costas gravei co móbil un plano e comentei que talvez o meu próximo filme tería unha montaña como protagonista. Algún tempo despois, a idea mantiña toda a súa forza na miña mente, polo que pensei que necesitaba rodar esa película.

Mentres preparaba o proxecto estiven a ler toda a información que atopaba sobre o Pico Sacro, á vez que as montañas «sacras» de Hokusai e Cézanne me servían de inspiración. Despois destes anos de traballo, e coa axuda dos meus habituais colaboradores, acabamos este filme titulado Pico Sacro, que ten a intención de mostrar o misticismo e o encanto que reside no mundo.