ROBERTO ROSSELLINI. RESTAURACIÓNS DIXITAIS

A figura do cineasta italiano Roberto Rossellini (1906-1977) adquire, se couber, renovada existencia co Proxecto Rossellini. Iniciativa de restauración dixital de varios dos grandes títulos da súa obra, -proposta derivada de tres grandes institucións italianas (Cineteca Nazionale, Cineteca del Comune de Bologna e Cinecittá Luce), en colaboración cunha importante empresa de produción e vendas internacionais, Coproduction Office- foi presentada no Festival de Cannes 2011 e fai posible que gocemos en todo o seu esplendor da filmografía dun autor que abriu as vías da modernidade.
Personalidade esencial na ruptura neorrealista, a súa progresiva e constante aproximación á realidade e o carácter humanista da súa produción fan del un incontestable mestre, como amosan algúns dos títulos do ciclo, de Roma, ciudad abierta a Te querré siempre/Viaggio in Italia. Retirado do cine, non da expresión fílmica, en 1963 –activo ata o final, o retiro do cine foi interrompido en Anno Uno (1974) e El Mesías (1975)-, Rossellini deseñou un proxecto case que enciclopédico e histórico para a RAI, a televisión pública italiana, con obxectivos eminentemente didácticos.
Rossellini, que consideraba a literatura como análise, vía o cine como unha síntese, unha mediación que facilitaba a confianza ou crenza no poder da ollada. Como del dixo François Truffaut, “un dos raros cineastas que prefiren a vida ao cine, a realidade á ficción, a reflexión á inspiración, o home ao actor, o contido ao continente, cuxa obra é a dunha intelixencia libre que querería axudar os demais homes a ser intelixentes e libres”. Durante estes dous meses proxectamos os filmes de Roberto Rossellini que xa están restaurados.