Off Galicia

Vikingland (2011) de Xurxo Chirro, título participante no FIDD de Marsella, un dos festivais de documental máis prestixiosos do mundo, logo presente en certames como Mar del Plata e Xixón, expresa á perfección a riqueza, talento e versatilidade do panorama audiovisual galego actual. Xunto a ela, o repaso da obra de Eva Quintas permite a estrea do seu traballo en Estados Unidos Soap Opera (2011), mentres Antón Dobao nos ofrece a súa adaptación de Álvaro Cunqueiro Sinbad (2011). Dúas homenaxes contribúen a recuperar parte do noso legado. Por unha banda, un proxeccionista recentemente falecido, Benjamín Jartín (Meira, 1926-A Coruña, 2011), cunha mesa redonda como tributo á súa persoa e oficio coa presenza de Pepe Coira, historiador, guionista e produtor, antigo director do CGAI e Alejandro Villodas, restaurador, proxeccionista e director do documental Salón París. 90 anos de sonos (2001). O 175 aniversario do nacemento de Rosalía de Castro descubre un patrimonio descoñecido e ata agora impensable, imaxes dunha homenaxe en Buenos Aires con grandes figuras intelectuais e un percorrido polas rutas da súa vida como auténticos reflexos da súa obra.
Agradecementos: Eva Quintas, Xurxo Chirro, Antón Dobao, Lorena Martínez, Ficción Producciones, Raquel Seoane, Pepe Coira, Alejandro Villodas, Iago Martínez.