Reunión

• Share on twitter
• Share on facebook

Cun suspense emocional sostido, tomándose o seu tempo e a súa distancia, con paciencia e á vez con intensidade, Reunión propón un encontro longamente postergado, enmarcado pola paisaxe abrupta da Illa Reunión nun irónico xogo de palabras. Neste encontro do director co seu pai nun intento por retomar o que parece un diálogo imposible, cercado por feridas non cicatrizadas. E os días parecen ir cedendo ante esa vexetación, esas rochas e esa piscina, nos que os silencios e os corpos falan con inusitada elocuencia.

Na edición de 2018 de INPUT, espazo de titorización e asesoría de proxectos cinematográficos en desenvolvemento que xorde da colaboración entre a Fundación Luis Seoane e (S8) Mostra Internacional de Cinema Periférico, Reunión, de Ilan Serruya, foi un dos proxectos elixidos. Uns meses despois, rematouse a película e tivo a súa estrea internacional en DocLisboa. Na edición de 2019 queremos pechar este ciclo compartindo co noso público a película rematada, que será presentada polo seu autor. Un proxecto que acabou de cristalizar á calor de INPUT e que exemplifica o que pensamos que é o propósito desta convocatoria.