Le fils de Joseph/ El hijo de Joseph

Le fils de Joseph
(Francia, Bélxica, 2016)
Dirección e guión: Eugène Green. Fotografía: Raphaël O'Byrne. Intérpretes: Victor Ezenfis, Natacha Régnier, Fabrizio Rongione, Mathieu Amalric, Maria de Medeiros. Dur: 115'.

Vincent vive feliz coa súa nai María, mais sempre co peso de non saber quen é seu pai. Un día descobre que se trata do pérfido editor parisiense Oscar Pormenor. Decidido a se vingar del, só poderá paralo un estraño, Joseph, co que traba unha relación paterno-filial que nunca antes experimentara.

Eugène Green volve á temática relixiosa coa adaptación libre de diversos relatos bíblicos coma os sacrificios de Abraham e Isaac ou a fuxida dos xudeus de Exipto, todos trasladados a un París contemporáneo e dende unha perspectiva familiar e íntima. A incursión no terreo editorial, con dúas caricaturas de vaidosos parisienses bobos – abreviatura de burgués bohemio – moi ben interpretados por Mathieu Amalric e Maria de Medeiros, permítelle ao autor facer un comentario sobre a imbecilidade dunha burguesía en decadencia, afastada de toda fe ou intelectualismo. Receita espiritual para unha sociedade sen compás.